Publicidade

Ourense Termal


Atrás · Actualidade · A guía de ECO · Subscrición · Contacto

Unha Europa que protexe: a materialización da solidariedade

PUBLICADO O 09 DE AGOSTO DE 2018 · (0)



FUNDACIóN GALICIA EUROPA · SARAI SUáREZ LOUZAO


Corina Cretu, comisaria de Política Rexional, declaraba en febreiro que “a UE non abandona a aqueles que se enfrontan a unha traxedia”, e o presidente da Comisión Europea, Jean-Claude Juncker prometía non limitarse a ofrecer condolencias cando un dos membros sufrira unha catástrofe. A solidariedade da Unión Europea vai moito máis alá de xestos simbólicos e esta promesa vense materializando dende a posta en marcha en 2001 do Mecanismo de Protección Civil acompañado pola creación do Fondo de Solidariedade da Unión Europea (FSUE) en 2002.

Cando hai unha catástrofe natural a Comisión activa en primeiro lugar mecanismos de resposta urxente. A primeira reacción inclúe o despregue de aeronaves de loita contra incendios ou de efectivos de protección civil. Isto é posible a través do Mecanismo de Protección civil da UE polo que se coordinan as contribucións voluntarias a un país que solicite axuda. Porén, a exacerbación das catástrofes naturais que estamos sufrindo nos últimos anos puxeron en evidencia os limites deste instrumento. Por este motivo, a Comisión Europea presentou en novembro de 2017 a proposta de creación de rescUE, unha reserva de capacidades de protección civil como avións de extinción de incendios, bombas de auga, equipos de busca e rescate ou hospitais de campaña, financiado para complementar os activos nacionais. A proposta está nas mans do Parlamento Europeo e do Consello ata que este sistema chegue a ver a luz.

Tras a activación dos mecanismos de resposta urxente, a Unión Europea procede a examinar a axuda financeira para a reconstrución a máis longo prazo, categoría na que se enmarcan os máis de tres millóns de euros que recibirá España do Fondo de Solidariedade da Unión Europea (FSUE) este ano. O FSUE creouse tras as graves inundacións que somerxeron Europa Central en 2002 para intervir no caso de asolagamentos, incendios forestais, terremotos, tormentas ou secas. Dende a súa creación leva entregados máis de 5.000 millóns de euros en 76 desastres en 24 países da UE, cos que se cubriron parte dos custos de urxencias, aloxamento provisional, operacións de limpeza forestal e protección do patrimonio cultural levados a cabo no momento das traxedias. 

Afortunadamente, España é un dos países que menos necesidade tivo de recorrer ao fondo. As tres ocasións nas que se utilizou, non obstante, forman parte xa da memoria máis negra do noso país: 8,6 millóns destinados a aliviar o verquido de chapapote do Prestige en novembro de 2002; 1,3 millóns para sufocar os incendios forestais que os lóstregos provocaran en Estremadura en 2003 e o terremoto que fixo tremer Lorca e motivou o desembolso de 21,1 millóns en 2011. A suma, 31 millón de euros, supón menos do 1 % do diñeiro concedido polo FSUE. No entanto, Galicia volve protagonizar esta historia: poucos esqueceron as 50.000 hectáreas arrasadas e as catro vidas perdidas durante os incendios do pasado outono. Nesta ocasión, a UE estará de novo á altura: o pasado 11 de xullo a Comisión Europea aprobou o desembolso de 3,2 millóns de euros con destino Galicia, que servirán para cubrir os custos de reparación de infraestruturas públicas, limpeza da zona e realoxo temporal dos afectados .

Coa esperanza de que os capítulos que relatan traxedias humanas e naturais se vaian pechando á medida que aprendemos a coidar o medio e a investir na prevención, resta a certeza de saber que, de acontecer, non nos enfrontamos a eles sós.



Comentar








Enviar

Comentarios (0)