Publicidade

Ourense Termal


Atrás · Actualidade · A guía de ECO · Subscrición · Contacto

“Nin a compra online se fai exclusivamente online, nin a compra física o é totalmente”



REDACCIÓN · PUBLICADO O 08 DE XUñO DE 2018 · (0)




O horizonte de Marineda City semella despexado, o que non quere dicir que anden despistados coas esixencias derivadas dos novos –xa non tanto– usos da xente. Ana López, xerente de Marineda, está segura de que hai espazo para os dous xeitos de mercar, cada un achega o seu.

En EE.UU. pecharon grandes superficies. Viviremos un “cribado” como sucede co pequeno comercio a pé de rúa?

A situación de Estados Unidos non é comparable á de Europa nin á de España, onde tanto a densidade comercial como a obsolescencia das superficies comerciais son moito menores. En España, como sector, seguimos crecendo por riba do que o fai o consumo privado. Con todo, iso non significa que non teñamos que reinventarnos constantemente, como debe facelo todo o comercio, para seguir resultando atractivos.

E como facedes fronte ao comercio electrónico?

É un grande desafío porque está a cambiar hábitos de consumo, traballamos para adaptarnos. Pero supón a oportunidade de ampliar a experiencia que ofrecemos máis aló do espazo físico e das limitacións de horarios.

Tedes algún estudo que recolla o tempo do visitante nas zonas de restauración, xogos e cinema?

Si, dende logo, a análise do comportamento é moi importante para coñecelos, anticipar necesidades e responder as expectativas.

E que peso ten o lecer?

En Marineda é unha das locomotoras. Os nosos visitantes pasan no centro unha media de 1 hora e 48 minutos e ese tempo non deixa de crecer ano tras ano. Representa ao redor dun 30 % da nosa actividade.

Fálase xa da transformación de moitos espazos de venda física, onde o sitio da almacenaxe para pedidos e recollidas de compras online aumenta. Percibídelo ou o tedes en conta?

Si. Temos instalacións de recollida de venda online dos principais operadores do mercado como Amazon e Correos, o que representa novas razóns para visitar o centro. E moitos establecementos, como o coñecido caso de Zara, dispoñen de puntos de recollida de vendas online en tenda, o que promove novas visitas e ocasións para interactuar co cliente.

Que vai supoñer o lanzamento da plataforma online piloto de Marineda?

Ten un dobre obxectivo. Por unha banda dar a oportunidade a todas as tendas de ter un escaparate online, de dispoñer tamén dunha canle de venda que permita xerar vendas adicionais. E pola outra ofrecer aos clientes a posibilidade de descubrir a oferta comercial antes da visita, de ampliar a experiencia de compra física cunha experiencia online pero desde calquera localización. Xunto coa entrega a domicilio, poderemos responder ao desexo de flexibilidade.

Chegará un momento en que se estabilizará o mercado?

É dicir, que sexa tan habitual comprar en tenda física como online e que permanezan os dous espazos, cada un coa súa oferta? Totalmente, estamos convencidos de que as dúas formas convivirán, e de feito, xa o fan en gran medida. Neste momento hai datos que nos din que, en España, o 65 % dos consumidores consultan o smartphone para comparar e buscar información sobre o produto dende a propia tenda, e gran cantidade das compras online realízanse desde a tenda física. Nin a compra online se produce exclusivamente online nin a compra física o é totalmente. Ademais o negocio online presenta unhas marxes moi reducidas polos altos custos loxísticos e de devolución, o que empuxa aos operadores e-commerce a abrir tamén puntos de venda físicos. A compra dos supermercados Whole Foods por parte de Amazon reflícteo perfectamente. E a escala máis local, en Marineda, o quiosco de lentes de sol Hawkers iniciou a actividade só con venda online.

Así que o pracer de pasear, tocar e probar permanecerá?

Sempre! E facelo en compañía! É parte do que nos fai humanos, non?

(Entrevista publicada no número 324 – maio 2018)



Comentar noticia








Enviar

Comentarios (0)