Atrás · Actualidade · A guía de ECO · Subscrición · Contacto

Estudantes da UDC conquistan o podio da fase galega da global Management Challenge (GMC)



REDACCIÓN · PUBLICADO O 09 DE MAIO DE 2022 · (0)



Óscar Martínez, Jacobo Díaz, Ana Karen Cuacuas e Adrián Lago, estudantes do Máster en Dirección e Administración de Empresas (MBA) do equipo Arume, representarán a Galicia na fase final da GMC: a maior competición de xestión empresarial do mundo baseada na simulación. Teñen que tomar decisións como se fosen un consello de administración.


Inicialmente reciben información histórica coas decisións e resultados da súa empresa referente aos últimos cinco trimestres. A partir da análise desta información, deben definir a estratexia e tomar decisións nos seguintes cinco trimestres. O equipo gañador é o que consegue dar maior rendibilidade aos accionistas da empresa, isto mídese en función do valor da acción, modificado polas accións emitidas e recompradas, así como os dividendos pagos aos accionistas. 

En cada trimestre deben tomarse un total de 77 decisións numéricas que afectan as áreas de Marketing, Operacións, Recursos Humanos e Finanzas, estas decisións inclúen:

  1. Publicidade (corporativa e produtos)
  2. Prezos (produtos e mercados)
  3. Transporte (contedores a distribuidores)
  4. Calidade (I+D, melloras, montaxe, materiais)
  5. Operacións (materiais, mantemento, quendas, web)
  6. Comercio Internacional (UE,  NAFTA, Internet)
  7. Comerciais (recrutamento, comisión, soporte)
  8. Medio Ambiente (impactos ambientais)
  9. Persoal (recrutamento, formación, salario)
  10. Finanzas (accións, dividendos, préstamos)

E tras meses de competición, Arume resultou vencedor dun total de doce equipos. Arume participará na Final Nacional na Cámara de Comercio de España, enfrontándose a equipos procedentes da Comunidad Valenciana, Andalucía, Castilla-La Mancha, e Madrid.

Global Management Challenge promove a innovación educativa da universidade, permitindo adquirir competencias profesionais de forma práctica, divertida e altamente competitiva. A diferenza da maioría das competicións de plan de negocio e de creación de empresas, en GMC -funcionando dende 1980- os participantes aprenden a xestionar, a tomar as decisións e entender o seu impacto en todas as áreas. E inicia aos universitarios na utilización de ferramentas que lles permite analizar o estado e evolución da súa empresa e enfrontarse a un mercado real e un contorno altamente competitivo.



Comentar noticia








Enviar

Comentarios (0)